Pjesëmarrja e të rinjve nga grupet IMPACT të World Vision Albania në takimin “N’Zë Europe”, organizuar nga Agjencia Kombëtare e Rinisë

Takimi “N’Zë Europe – Të Rinjtë që Formësojnë të Ardhmen Europiane”, i organizuar nga Agjencia Kombëtare e Rinisë, mblodhi së bashku të rinj nga e gjithë Shqipëria, përfaqësues institucionesh dhe aktorë të shoqërisë civile, me qëllim nxitjen e dialogut mbi rolin e të rinjve në proceset demokratike dhe në rrugëtimin europian të vendit.

Në këtë aktivitet morën pjesë edhe të rinj nga grupet rinore IMPACT të World Vision Albania, së bashku me përfaqësues të organizatave të tjera rinore, duke kontribuar në diskutime dhe shkëmbime idesh mbi sfidat dhe mundësitë që lidhen me angazhimin rinor dhe integrimin europian.

Diskutimet theksuan rëndësinë e përfshirjes aktive të të rinjve në jetën publike dhe në proceset vendimmarrëse, duke evidentuar rolin e tyre si kontribues të drejtpërdrejtë në zhvillimin demokratik dhe në avancimin e agjendës europiane të Shqipërisë.

Agjencia Kombëtare e Rinisë vijon të mbështesë dhe fuqizojë të rinjtë përmes krijimit të hapësirave gjithëpërfshirëse për dialog, pjesëmarrje dhe bashkëpunim ndërinstitucional, në funksion të ndërtimit të një shoqërie aktive dhe të orientuar drejt vlerave europiane.